Cənubi Qafqaz həm də mədəniyyətlərin savaş meydanına çevrilib, milli dəyərlərlə yad dəyərlər döyüşür. ABŞ və Qərb ölkələrinin Cənubi Qafqaz ölkələri qarşısında gizli olmayan əsas iki tələbi var:
1. Milli dəyərlərdən və mental təfəkkürdən imtina (əvəzində “demokratik ənənə”lər adı atında LGTB-nin, feminizmin, xaotik layihələrin yeridilməsi)
2. Rusiyaya qarşı formalaşan qütbdə yer almaq
ABŞ-ın vəd etdiyi "demokratik ənənə"ləri fərdlərin, icmaların hüquqlarının qorunması üzərində qurulub və hər hansı icmanın, fərdin hüquqları bir millətin iradəsindən üstün mövqedə dura bilməz. Əgər bu fərd və icmalar, təşkilatların fəaliyyəti milli təhlükəsizliyə, milli dəyərlərə ziddirsə, heç dura bilməz.
Gürcüstan öz sözünü deməkdədir...
ABŞ Cənubi Qafqaz xalqlarının milli dəyərlərini, mental təfəkkürünü sıradan çıxarmadan həmin ölkələrin Rusiyaya qarşı cəbhədə yer almasını təmin edə bilməyəcəyini başa düşür. Gürcüstan ABŞ-ın Cənubi Qafqazdakı əsas forpostu kimi Azərbaycanda da müxtəlif təşkilatların, icmaların və fəalların maliyyələşməsində əsas mərkəzə çevrilib. Gürcüstanda “Xarici agentlər haqqında qanunun qəbulu” 20 ilə yaxındır bu ölkənin aparadığı yanlış siyasətin dönüş nöqtəsi hesab oluna bilər. ABŞ və Qərb ölkələri məhz bu qanunu qəbul etdiyinə görə Gürcüstanı şantaj edir. Axı bu qanun hələ 1938-ci ildə ABŞ-da qəbul edilib, bu qanunu qəbul edən ölkələr siyahısında Ukrayna, Macarıstan, Kanada, Bolqarıstan və digər ölkələr də var. Sizə olar, Gürcüstana yox? Siz öz milli təhlükəsizliyinizi qorumalısınız, Gürcüstan yox?
Gürcüstan ABŞ və Qərb ölkələri üçün növbəti sürpriz hazırlayır. Belə ki, Gürcüstan LGTB-nin təbliğatını qadağan edən qanunu qəbul etmək iradəsini ortaya qoyub. Bu qanun ötən il Rusiyada da qəbul edilib və LGTB ekstremist qruplar kimi dəyərləndirilib. Qərbdə yaranan demokrafik xaosun əsas səbəbi məhz gey icmalarının sayının çoxalması, LGTB-nin daşlaşmış şəkil almasıdır. Bu demoqrafik xaos Cənubi Qafqaz ölkələrinə niyə transfer olunmalıdır?
Gürcüstan hökuməti haqlı olaraq bildirir ki, “biz öz dəyərlərimiz və prinsiplərimizlə Avropa Birliyinə daxil olmaq istəyirik...”.
Qərb ərazilərini itirən, hələ də monolit hökumət formalaşdıra bilməyən Gürcüstana bu illər ərzində cəmi iki şey verə bilib: Aİ üzvlüyünə namizəd (təsəvvür edin, Türkiyə 1999-cu ildən namizəddir) və vizasız gediş-gəliş. Bu gün ABŞ və Aİ məhz bu iki “güzəşt”in ləğv ediləcəyi ilə Tiflisi şantaj etməkdədir.
Fiziki təhlükələrdən qorunsaq da, ideoloji risklər pik həddədir
Zaman-zaman Azərbaycan hökumətini ağılsızlıqda ittiham edən klassik Qərbyönümlü siyasilər bir mətləbi anlamaqda çətinlik çəkməsinlər: Azərbaycan xaricdən maliyyələşməni illər öncə qadağan edib və əgər bunu etməsəydi, bu gün ölkədə sabitlik olmayacaqdı. Problemlər çoxdur, hədsiz dərəcədə, amma heç kəs deyə bilməz ki, Azərbaycanda sabitlik yoxdur. Bu sabitliyin əsas qaranatiyalarından biri illər öncə Azərbaycan hökumətinin ABŞ-ın Cənubi Qafqaza ixrac etdiyi layihələrdən imtina etməsidir. Azərbaycan başa düşürdü ki, bu “mədəni və sivil” layihələr insan hüquqlarının qorunmasına yox, daha çox ABŞ-ın ölkəmiz asan şəkildə daxil ola bilməsi üçün bütün milli dəyərlərin məhvinə hesablanıb.
Bir neçə il öncə STM-nin sədri Z.Orucla təkbətək söhbətimdə də demişdim, Azərbaycan sürətlə “Dəmir Gümbəz” konsepsiyasını hazırlayıb icra etməlidir. Sərhdlərin bağlı olması fiziki təhlükələrdən qoruyursa, amma ideoloji olaraq, ölkənin qapıları, pencərləri açıqdır, neqativ və xaotik axının qarşısını ala bilmirik. İcra edilən “Dəmir Gümbəz” “yad dəyərləri” itələmə gücünə malik olmalıdır, bizə lazım olanı buraxmalı, lazım olmayanı rədd etməliyik.
Əsas təhdid qarşıdadı...
Ələlxüsus, ideoloji risklər içərisində ən təhlükəlisi - ölkəyə idxal edilən yad dini təriqətlərdir. Azərbaycan oturuşmuş, ənənəvi təriqət var, heç bir ölkə Azərbaycana öz təriqətini daşımamalı, xalqın inanc sistemini dəyişməməlidir. Səudiyyə Ərəbistanın özününü sürətlə imtina etdiyi, ABŞ-ın dəstəklədiyi təriqətin Azərbaycana idxal edilməsinin nə faydası ola bilər?! Bunun sonu fəlakətdir. Hesab edirəm və tam məsuliyyətlə deyirəm ki, yad dəyərlərlə yanaşı, yad təriqətlərin ölkəmizə idxalı təhlükəsizliyimiz üçün əsas təhdidə çevrilə bilər. Arxamızı söykədiyimiz ölkələrin bu məsələdə canfəşanlıq göstərməsi bizə olan pozitiv münasibətlərinin göstəricisi hesab oluna bilməz.
ABŞ Cənubi Qafqazı itirir
Bir müddət əvvəl Rusiyanın Cənubi Qafqazı itirdiyini düşünürdük.
Azərbaycan Rusiya ilə strateji müttəfiqdir, iki ölkə arasındakı pozitiv münasibətlərin detalları izahına lüzum görmürəm. Rusiya torpaqlarımızdan öz ordusunu da çıxardı. Dünənki görüşdə Paşinyanla Putinin razılığa gəldiyi və rus qoşunlarının Ermənistan ərazisindən də çıxarılacağı ilə bağlı razılaşma əldə olunduğu bildirilir. Baş verənləri Rusiyanın zəifliyi kimi şərh edənlər bu “zəif güc” sahibinin iki ildən artıqdır Avropada hansı güclə müharibə apardığını heç cür izah edə bilmirlər. Rusiya razılaşır və çıxır. Bu qədər sadə? Bir qanunun qəbulu ilə Qərb-Gürcüstan münasibətləri yenidən sıfırlandı. ABŞ Cənubi Qafqazda həm də ona görə məğlub olur ki, xalqların dəyərlərinə təcavüz edir.
Düşünürəm ki, Cənubi Qafqaz siyasi olaraq, Rusiya ilə eyni dairədədir, Azərbaycan istisna olmaqla, nə Gürcüstan, nə Ermənstanın iqtisadi müstəqilliyi yoxdur, ideoloji olaraq isə hər üç ölkə reanimasion durumdadır. İdeoloji toplar hazır olmalıdır, preventiv tədbirlər nəticə verə bilməz, çünki bu istiqamətdə radikal addımlar atılmalıdır. Bütün bunlara nail olmaq üçün Ermənistan da, Gürcüstan da Azərbaycanın arxasınca gəlməlidir.
Samir Feyruzov - dia-az.info
