Dia-az.İnfo İsveçrə və dünya reytinqində 7-ci sırada olan Sürix Universitetinə qəbul olan tələbə ilə müsahibəni təqdim edir...

Vüsal Hümbətzadə öz təəssüratlarından  danışıb:

Salam, hər vaxtınız xeyir olsun! Zəhmət olmasa oxucularımıza özünüzü təqdim edin və özünüz haqqınızda qısa məlumat verin.

 -  Tələbə Vüsal Hümbətzadə: Salam. Mən Hümbətzadə Vüsal Nurəddin oğlu 2003-cü ildə anadan olmuşam. 2020-ci ildə Azərbaycan Dillər Universitetinə qəbul olub 2024-cü ildə həmin universitetin məzunu olmuşam. Təhsil aldığım müddət ərzində həm müxtəlif lahiyələrdə və tədbirlərdəki iştirakım, həm akademik, həm də sosial göstəricilərimin yüksək səviyyədə olması mənimdə digər tələblərdən seçilməmin ən əsas göstəricilərindən biridir.

 İsveçrənin seçmək təsadüfü oldu, yoxsa əvvəlcədən bu ölkədə oxumaq istəyirdiniz?

- Tələbə Vüsal Hümbətzadə: Hansısa təhsil ölkəsinin təsadüfi seçilə biləcəyini düşünmürəm. Çünki mövzu təhsildirsə, yüz ölçüb bir biçmək gərəkdir. Təbii ki, mən də bu qərar vermə mərhələsindən keçmişəm. Bakalavr təhsilim müddətində və sonrasında İsveçrədə aparılan müxtəlif elmi işlərdə iştirak etmə və müşahidə etmə şansım olub, hansı ki, qərar müddətimdə bu təcrübələrin də böyük təsiri olduğuna inanıram. 

Niyə məhz bura?

- Tələbə Vüsal Hümbətzadə: İsveçrə bir çox sahələrdə elmin beşiyi hesab edilir. Xüsusilə də səhiyyə və elm sahələrində (Health and Science Studies) aparılan araşdırmaları, araşdırma institutları və mərkəzləri, elm adamları ilə önəmli nüfuza sahibdirlər.

 Təhsil aldığınız universitetdə azərbaycanlı tələbələr var?

- Tələbə Vüsal Hümbətzadə: Hazırda İsveçrədə bir neçə azərbaycanlı tələbə təhsil alır.


 İsveçrədə təhsil almağın üstünlükləri barədə fikirləriniz nədir?

-  Tələbə Vüsal Hümbətzadə: İsveçdə təhsil almağın bir çox üstünlüyü var. Tədris sisteminin unikallığını qeyd etmək olar. Dərslər çox olmadığı üçün zamanınızı sizin üçün əhəmiyyətli olan başqa məşğuliyyətlərə (idman, şəxsi inkişaf, əyləncə və.s) sərf edə bilərsiniz. 

Xaricə gedən tələbələr Azərbaycana qayıtmaq istəmir. Bəs siz? Gələcək planlarınız nədir?

- Tələbə Vüsal Hümbətzadə: Ölkəmizin elm və bənzəri sahələrdə mütəxəssislərə ehtiyacı var, xüsusilə də yeni mütəxəssislərin yetişdirilməsi baxımından. Buna görə də, akademik karyeraya davam etmək, öyrəndiklərimi müvafiq sahədə insanların həyatlarını yaxşılaşdıra biləcək şəkildə tətbiq etmək, başqaları ilə bölüşmək istərdim.

Təhsildən sonra planlarınız nədir?

-  Tələbə Vüsal Hümbətzadə: Planlarım çoxdur, gediləcək uzun bir yolum da var. Universiteti bitirdikdən sonra əsas hədəflərimdən biri doktorantura səviyyəsi üzrə təhsil almaqdır. Təhsil müddətində isə, Erasmus proqramı vasitəsilə digər bir ölkədə 1 semestr təhsil almağı arzulayıram. Çünki, fərqli universitet, fərqli ölkə və fərqli millət mənim dünyagörüşümü maksimum dərəcədə genişləndirəcək və mənim şəxs kimi formalaşmağıma daha çox töhfə verəcəkdir. Təhsilimi bitirdikdən sonra, təbii ki, Vətənə geri dönərək karyera planlarımı həyata keçirəcəyəm.

Müsahibəni aldı: Nəzrin Nəcəfova