Ölkədə uzun illərdən bəri hökm sürən xaotik taksi fəaliyyətinin nizama salınması üçün bir müddətdir işlər həyata keçirilir. Bununla bağlı xüsusi normalar da qəbul olunub. Bu normaların tətbiqi ilə iyundan sonra taksi fəaliyyəti ilə bağlı qaydaların daha da sərtləşəcəyi bəlli idi.
Bu proseslə bağlı yeni bir nüans da bəlli olub. Belə ki, Azərbaycanda müəyyən saydan sonra qanunvericiliyin tələbinə uyğun olaraq taksi sayına məhdudiyyət qoyula bilər.
Bu barədə APA-nın sorğusuna cavab olaraq, Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyindən (AYNA) bildirilib.
""Avtomobil nəqliyyatı haqqında" Azərbaycan Respublikası Qanununa əsasən avtomobil nəqliyyatı xidmətlərinin səmərəliliyinin və keyfiyyətinin artırılması, habelə ümumi istifadədə olan avtomobil nəqliyyatı ilə daşımalarda nəqliyyat növləri üzrə sərnişin axınlarının paylanmasının optimallaşdırılması məqsədilə taksi minik avtomobilləri ilə sərnişin daşımaları üçün icazələrin və onların əlavələrinin sayına məhdudiyyətlər tətbiq edilə bilər", - deyə qurum qeyd edib.
Taksilərin çoxluğu ölkədə işsizlik problemi ilə də bağlıdır. Bu gün rəsmi və qeyri-rəsmi şəkildə taksiçiliklə 150 min nəfərdən artıq şəxsin məşğul olduğu bildirilir.
Millət vəkili Vüqar Bayramov “Yeni Müsavat”a açıqlamasında bildirdi ki, taksi xidmətinin keyfiyyətinin artırılması, eyni zamanda qiymətin optimallaşdırılması çox vacibdir. Vüqar Bayramov xatırladıb ki, Milli Məclisdə taksi xidməti ilə bağlı müzakirələr zamanı qiymətlərdə kəskin artımlara yol verilməməsi üçün təkliflər irəli sürülmüşdü: “Qiymətlərin əlçatan, optimal olması vacibdir. Taksilərin sayında dəyişiklik baş versə də, daha optimal qiymətlərlə taksi xidmətinin keyfiyyətinin artırılmasına xidmət edən şərait yaradılmalıdır. Eyni zamanda çox vacib məqamlardan biri ictimai nəqliyyatın keyfiyyətinin və intensivliyinin artırılmasıdır çünki bu, taksi xidmətinə tələbin azalmasına gətirib çıxara bilər. Ona görə də taksi xidmətində islahatlarla yanaşı, ictimai nəqliyyatda dövriliyin, tezliyin artırılması da önəmlidir. Biz son illər ictimai nəqliyyatda xidmətin keyfiyyətinin artırılmasını müşahidə edirik. Bütün bunlarla yanaşı, sıxlıq məsələsini diqqətdən kənarda saxlamaq olmaz. Bir sözlə, paralellər aparılması, ictimai nəqliyyatdakı islahatlarla taksi xidməti sahəsindəki islahatların dəstəklənməsi olduqca vacibdir”.
İqtisadçı-ekspert Xalid Kərimli isə müxtəlif aspektlərdən təhlillərin aparılmasının önəmini vurğulayıb. Ekspert qeyd edib ki, məsələyə kompleks baxılmalıdır: “Qeyri-rəsmi rəqəmlərə görə, taksilərin sayı 80 mindir, bu rəqəmin 20 minə salınacağı bildirilir. Digər ölkələrin təcrübəsi təhlil olunubmu? Adambaşına düşən taksi sayı hesablanarkən ictimai nəqliyyatın vəziyyəti nəzərə alınıbmı? İnsanların velosiped, skuterlərdən istifadəsi, piyada gəzmək imkanlarına diqqət yetirilibmi? Amsterdam Avropanın ən böyük şəhərlərindən biridir, amma əhalinin əhəmiyyətli hissəsi velosiped sürə bilir, infrastruktur da tam olaraq bu istiqamətdə qurulub. Odur ki, sadəcə müqayisə aparmaq yetərli deyil. Bu məsələyə kompleks baxılmalıdır. Bakı Metropolitenində stansiyaların sayı artırılır, amma metroda yenə də sıxlıqdır. Dünyanın əksər şəhərlərində metrolarda bu qədər sıxlıq olmur, çünki Bakı metrosunda cəmi iki xətt var. Moskvada metropoliten dairəvi sxemlə qurulub. Şanxayda isə 8-9 paralel metro xətti var. Bu da sıxlığın aşağı düşməsinə səbəb olur, eyni zamanda şəhərin bir başından o biri başına getmək üçün uzun zaman lazım olmur. Bakı çox da böyük şəhər hesab olunmur, amma metro ilə səyahət bəzən 1 saat zaman alır. Ağıllı planlama olmalıdır. İctimai nəqliyyatla bağlı problemləri həll etmədən kasıb-kusubun iş yeri olan taksi sektorunun üstünə düşürlər... Bu, doğru yanaşma deyil. Əhali rahat səyahət üçün taksilərə üz tutur, qurumlar isə sektoru "boğurlar". Koordinasiya edilmiş strategiyasının olduğunu güman etmirəm. Hər qurumun ayrı prioritet irəli sürməsi çıxış yolu deyil. Taksi sektorunda vəziyyət ürəkaçan olmasa da, kifayət qədər rəqabətli sektordur. Əhali üçün qiymətlər əlverişli formalaşıb. Dünyanın heç bir ölkəsində taksi qiymətləri Azərbaycandakı kimi deyil. Bunu əsas götürüb qiyməti artırmaq doğru deyil. Təhlükəsizlik məsələləri ortaya qoyulmalıdır. Bütün problemlərin taksilərin fəaliyyəti ilə bağlı olduğunu güman etmirəm. On minlərlə şəxs başqa qazanc yeri olmadığı üçün taksi sürücüsü işləyir. Bu xidmətdə məhdudlaşdırmalar tətbiq etmək, bahalaşmaya getmək cəhdləri cəmiyyəti narahat edir. Düşünürəm ki, standartlar olmalıdır, lakin tənzimləmələri ictimai nəqliyyatın inkişaf etdirilməsi ilə paralel aparmaq lazımdır".
