“Dəryaz” qəzetinin internet səhifəsi olan “Deryaz.az” saytında 17 may 2024-cü il tarixdə “Yenigün məktəbinin qara günləri” sərlövhəli, “Direktor əzizi ölən müəllimlərə icazəni pulla satır” yarımbaşlıqlı tənqidi məqalə dərc olunmuşdu. Ağstafa rayon Elçin Mustafayev adına Yenigün kənd tam orta məktəbində korrupsiya və direktor özbaşınalığının baş alıb getdiyi barədə redaksiyamıza daxil olmuş məlumatlar əsasında hazırlanmış həmin məqalədə söhbət təhsil müəssisəsinin rəhbəri Tamella Bayramovanın həm müəllimlərdən, həm də texniki işçilərdən hər vəchlə rüşvət qoparmaq üçün istədiyi yola əl atmasından, müəllimləri ən adi qüsur üstündə, çox vaxt da əsası olmayan arqumentlərlə şagirdlərin gözü qarşısındaca təhqir etməsindən, onun kobud rəftarından bir çox müəllimin xəstəlik tapmasından, dərs bölgüsündə rəvac verdiyi ədalətsizlikdən, dərs vəsaitləri və ləvazimatları ilə təchizat məsələsində süni surətdə problem yaratmasından, səhər dərsə bir neçə dəqiqə gecikən şagirdləri məktəbə buraxmamasından və s. özbaşınalıqlarından gedirdi.
Onu da qeyd etmişdik ki, redaksiyamıza daxil olan məlumatları dəqiqləşdirmək üçün Regional Təhsil İdarəsinin müdiri Arslan Hacıyevə, müavini Nizaməddin Babanlıya, Ağstafa Təhsil sektorunun müdiri Mədəd Zeynalova etdiyimiz müraciətlər də cavabsız qalıb. Görünür, onlara qızıl alveri ilə məşğul olan, sələmə pul verən, dövlətin məktəbə ayırdığı vəsaiti, A4 formatlı kağız, marker kimi tədris ləvazimatlarını satıb varlanan, rəhbərlik etdikləri kollektivlərə, çiyin-çiyinə çalışdıqları həmkarlarına qan udduran, bir sözlə, pul yığmağı və “yuxarı” ötürməyi bacaran şəxslər sərf edir.
Əvəzində isə redaksiyamıza T.Bayramovanın despotik üsuli-idarəsindən şikayətlər daxil olmaqda davam edir. Belə ki, valideyn Arzu Zaur qızı redaksiyamızın əməkdaşına kamera önündə müsahibə verərək bildirib ki, direktor onun oğlu Nəzərov İlkini “sən qıza oxşayırsan” deyə təhqir edib və saçını qırxaraq məktəbdən qovub. Üstəlik, IX sinifdən xaric edib: “Mənin uşağım vaxtlı-vaxtında dərsinə gedirdi. Qovulduqdan sonra üç aydır depressiyaya düşüb, hətta intihara cəhd edib. Direktor deyir ki, mən Tamellayam, bildiyimi eləyirəm”.
Texniki işçilərdən Zülfiyyə Musayeva deyir ki, ayağı burxularaq xəsarət almış şagirdi həkimə aparmaq üçün icazə istəyib, direktor razı olmayıb, “həkim adı ilə icazə alıb başqa yerə gedirsiz” deyib. Z.Musayeva direktora xatırladıb ki, onun özü də qardaşı oğlunu həkimə aparanda məktəbə gəlməyib. Bundan sonra direktorun acığı tutub: “Sən ki mənim qardaşım oğlunu dilə-dişə salırsan, gör başına nə oyun açacağam!” Z.Musayeva həmçinin bildirib ki, T.Bayramova işçiləri hədələyərkən, “hətta şikayətlərinizlə işdən çıxarılası olsam da, yenidən bərpa olunub sizi işləməyə qoymayacam” deyir.
Məktəbdə ocaqçı işləmiş başqa bir qadın isə deyir ki, ailə başçısını itirib, azyaşlı uşağını saxlamağa maddi imkanı yoxdur. Bununla belə direktor onu işdən qovub, yerində qalması üçün 500 (beş yüz) manat rüşvət istəyib ki, o da verə bilmir.
